Babelaelwa ba le bararo ba ba latofatswang ka bogodu jwa koloi jaaka ba ne ba tlhageletse kwa kgotlatshekelo ya ga Magistrata wa Schweizer-Reneke
Mohau Maretele
IPELEGENG – Makolwane a le mararo, ba ba lebisitsweng melato e e akaretsang bogodu jwa sejanaga, ba tlhageletse kwa kgotlatshekelo ya ga Magistrata wa Schweizer-Reneke kgwedi ya Mopitlwe e tlhola malatsi a le robongwe, ngwaga wa 2023.
Boraro jo, ebong, Samuel Poloko Siamisang wa dingwaga tse di masome a mabedi le borobedi (28), Prince Rolihlahla Tshabalala wa dingwaga tse di masome a mabedi le borataro (26) le Phenyo Confidence Maleho wa dingwaga tse di masome a mabedi le bone (24), ba tshwerwe kgwedi ya Mopitlwe e tlhola malatsi a supa,2023 kwa motse-setoropong wa Ipelegeng.
Go ya ka sebueledi sa mapodise a Bokone Bophirima, Lefotenente Kolonele Amanda Funani, setlhotshwana se sa dirukutlhi, se ne se batliwa ke mapodise a Mahikeng ka ditatofatso tsa go kgothosa lefelo la kgwebo le go utswa sejanaga kwa Mmabatho.
MORONGWA o fitlheletse tshedimosetso e e supang fa mapodise a Ipelegeng a ile a longwa tsebe ke Flying Squad ya sepodise sa Mahikeng ka ga sejanaga sa mmala o pududu sa modiro wa VW Polo. Sepodise sa Schweizer-Reneke, se ne sa bona sejanaga se, ka Labobedi se kgweediwa ka lobelo lo lo feteletseng mo toropong. Mapodise a ne a leka go emisa mokgweetsi wa sejanaga se, mme, a lebotsa phokoje.
Mapodise a Schweizer Reneke, ba ne ba inaakanya le ba sepodise sa Ipelegeng, mme ba gata mogatlana wa sejanaga sa babelaelwa. Lobelo lo lwa tshwarang tshwarang, lwa felela kwa motseng wa Ipelegeng. Ka go tlhoka lesego, mokgweetsi wa babelaelwa o ile a latlhegelwa ke taola ya sejanaga, mme tswa mo tseleng go thula pale ya motlakase.
Mapodise, ba ile ba leletse makolwane a mararo a ditshipo, mme ba ba fitlhela ka dithoto tse go belaelwang e le tsa bogodu ga mmogo le tlhobolo ya matshamekwane.
Kgotlatshekelo e ile ya busetsa kgetsi kgatlhanong le balatofadiwa ba, kwa morago go 16 Mopitlwe 2023 go ba neela tshono ya go rulaganya mmueledi le go kopa go emela tsheko ba le kwa ntle.
Ka nako ya fa Magistrata ane a botsolotsa babelaelwa, Tshabalala, yo eleng moagi wa Zimbabwe, le Maleho ba tlhagisitse gore, ba nale dikgetsi tse dingwe tse ba di sekang tsa bogodu le kgothoso ya sejanaga.
