Maloko a Economic Freedom Fighters go ralala Sedika sa ga DrRSM ba ne ba semelela ka go phepafatsa mafelo a le mantsi go gakologelwa Andries Tatane yo o swetseng thebolelo ditirelo mo sechabeng
Mohau Maretele
CHRISTIANA – Lekoko la Economic Freedom Fighters le simolotse ngwaga ono ka go thangkgolola letsholo la go phepafatsa metse setoropo le le teeletsweng ka Andries Tatane. Meleko Andries Tatane o ne a bolawa ke mapodise ka go thuntshiwa ka dikolo tsa rabara, ka nako ya mogwanto wa thebolelo ya ditirelo kwa porofenseng ya Free State kgwedi ya Moranang e tlhola malatsi a le lesome le boraro ka ngwaga wa 2011. Letsholo le le setse raletse di karolo tse di farologaneng mo Africa Borwa go akaretsa le profense ya Bokone Bophirima. Moeteledipele wa lekoko eleng Julius Malema o ne a eteletse letsholo leo kwa masepaleng wa Ditsobotla go sale gale mo kgweding ya Mopitlwe monongwaga.
Ka nako eo, ka kgwedi ya Mopitlwe 2023, letsholo la Andries Tatane le ne le tsweleletse kwa Christiana kwa masepaleng wa Lekwa-Teemane. Maloko a lekoko la EFF a ne a semeletse go phepafatsa dithuthubulu mo dikgaolong tse di farologaneng go fitlhelela le lefelo le le go latlhelwang matlakala mo go lone la kwa Marikana. Ka nako ya fa ane a bua le bobegakgang, moeteledipele wa lekoko Julius Malema o kaile gore, maitlhomomagolo a letsholo le, ke go itlhaganedisa ditirelo ko baaging jaaka Tatane a tlhokafetse a lwela thebolelo ya ditirelo. Moleloko wa lekoko mo sedikeng sa Dr Ruth Segomotsi Mompati eleng Lebogang Koboekae le ene o gatisitse mantswe a mopresidente Malema. “Letsholo la go phepafatsa la Andries Tatane le simolotse ka ko profenseng ya Gauteng ka maikaelelo a go tlisa ditirelo le go rotloetsa baagi go tshelela mafelong a phepa.” Koboekae o kaile jalo. Dikarolo tse dingwe tsa sedika sa Dr Ruth Mompati tseo letsholo le le fetileng mo go tsone di akaretsa kwa masepaleng wa Mamusa, wa Naledi ga mmogo le ko masepaleng wa Kagisano-Molopo.
